بھینگے پن کے اپریشن کے بعد کی ہدایات

بھینگے پن کے اپریشن کے بعد کی ہدایات

  1. سب سے پہلی بات یہ ہے کہ شفا دینے والا اللہ تعالی ہے اِس لئے اُس سے مسلسل دُعا کرتے رہیں۔ اور جِتنا فائدہ ہوتا جائے اُتنا اللہ کا شکر ادا کرتے جائیں کیونکہ شکر کرنے اور اِحسان کی قدر کرنے سے اللہ تعالی خوش ہوتے ہیں اور اپنی عطاؤں میں اضافہ کرتے ہیں۔ اِس سے توقع ہے کہ جلد از جلد اور مکمل شفاء مل جائے گی۔
  2. اگر آپ کو شُوگر، بلڈ پریشر، دمہ یا کوئی اور دائمی بیماری ہو تو اُس کی دوائیاں بند نہ کریں بلکہ پہلے سے بھی زیادہ احتیاط سے اُس کا علاج کریں تاکہ آنکھ کے اپریشن میں کوئی پیچیدگی پیدا نہ ہو۔
  3. اپریشن کے بعد کم ازکم ایک ہفتہ آنکھ کو عام پانی سے صاف نہ کریں۔ خصوصاً صابن یا شیمپُو آنکھ میں نہیں جانا چاہئے۔
  4. روزانہ صبح صاف روئی کو پانی میں اُبالیں؛ اُبلنے کا وقت قریباً آدھا گھنٹہ ہونا چاہئے۔ پھر اُسے ٹھنڈا کریں؛ جب نیم گرم ہو جائے تو اُس روئی سے ایک دفعہ آنکھ کو صاف کر لیں۔ بعد میں آنکھ کی صفائی کے لئے رومال وغیرہ اِستعمال کرنے کی بجائے ٹشو پیپر اِستعمال کریں اور ایک صفحہ اِستعمال کرکے پھینک دیں اُسے باربار اِستعمال نہ کریں۔
  5. مُجوّزہ قطرے اندازے سے ڈالنے کی بجائے گھڑی دیکھ کر بتائے گئے وقفے کے مطابق آنکھ میں ڈالیں۔ اِسی طرح کھانے والی ادویات کو بھی بڑی باقائدگی سے اِستعمال کریں۔ اپریشن کے بعد کے ابتدائی دن بہت ہی اہم ہوتے ہیں۔ اِس دوران دوائی کے اِستعمال میں بےاِحتیاطی یا بےقائدگی بعض اوقات کسی بڑی پریشانی میں مبتلا کر دیتی ہے کیونکہ نہ جراثیم کسی کا لحاظ کرتے ہیں اور نہ ہی دوائی۔
  6. جُھکنے اور وزن اُٹھانے کی کوئی اِحتیاط نہیں۔
  7. آنکھ کو ملنے سے خصوصی پرہیز کریں۔
  8. نماز کی ادائیگی میں بالکل تعطّل نہیں آنا چاہئے البتّہ آنکھ کا دو ہفتے تک مسح کرتے رہیں۔
  9. چُبھن، یا معمول سے کُچھ زیادہ پانی آنا ایک قدرتی امر ہے اِس سے نہ گبھرائیں۔ البتّہ اِن میں سے کوئی علامت بہت زیادہ ہو یا کوئی اور علامت نئے سرے سے پیدا ہو جائے یا نظر بہت زیادہ کم ہونے لگے تو فی الفور رابطہ کریں بالکل تاخیر نہ کریں۔
  10. اِس اپریشن کے بعد سُرخی ایک لازمی چیز ہے۔ اِس کی ایک وجہ تو چِیرنے اور سینے کا عمل ہے جو اِس اپریشن کالازمی جزو ہے۔  دُوسری وجہ یہ ہے کہ عضلات کو جِن جگھوں پر ٹانکے لگا کر سِیا جاتا ہے وُہ جگہیں کئی مہینوں تک سُرخ اور اُبھری اُبھری رہتی ہیں۔
  11. بہت زیادہ لیٹے رہنے کی ضرورت نہیں بلکہ چہل قدمی کرنا صحت کے لئے مفید ہوتا ہے۔
  12. کھانے پینے کے حوالے سے کوئی خصوصی اِحتیاط نہیں ہے؛ البتّہ دیگر بیماریوں کے لئے جو اِحتیاطیں بتائی گئی ہیں وہ ضرور کریں۔
  13. بے ہوشی کی صورت میں اپریشن کے قریباً چھ گھنٹے بعد تک کھان پلانا منع ہوتا ہے۔
  14. گھر میں تڑکا لگانے یا دیگر معمول کی سرگرمیوں کو معطّل کرنے کی کوئیضرورت نہیں۔
  15. آنکھ میں جو ٹانکے لگائے گئے ہیں اُن کو عموماً نکالا نہیں جات بلکہ وُہ خود بخود جذب ہو جاتے ہیں، اِس دوران وقتاً فوقتاً آنکھ کا معائنہ کروانا ہوگا تاکہ اگر کوئی پیچیدگی پیدا ہونے لگے تو فوراً اُس پر قابو پایا جا سکے۔
  16. بھینگا پَن کا اپریشن ہونے کے کافی عرصہ بعد تک آنکھ کے سیدھا ہونے کا عمل جاری رہتا ہے، اِس لئے اگر فوری طور پر اگر کُچھ ٹیڑھا پَن موجود ہو تو پریشان نہ ہوں اِنتظار کریں اِنشاءاللہ ہستہ آہستہ مزید بہتری ہو جائے گی۔